Meðhöndlun kvartana
Að taka á móti kvörtunum er algengur og eðilegur hluti af því að starfa í þjónustu. Ef að rétt er staðið að málum og vel unnið úr kvörtunum er auðveldlega hægt að breyta neikvæðri upplifun í jákvæða. Stjórnendur þurfa að skýra hversu langt starfsmenn mega ganga í að bæta fyrir það sem miður hefur farið. Þegar þú tekur á móti óánægðum viðskiptavini er gott að fara eftir þessum atriðum:
Fyrsta skrefið er að hlusta og sýna skilning:
- Veittu viðskiptavininum athygli og hlustaðu vandlega á það sem hann hefur að segja. Eitt mikilvægasta atriðið til þess að róa reiðan viðskiptavin er að láta hann finna að á hann sé hlustað.
- Vertu kurteis og vingjarnleg/-ur en hlutlaus.
- Afsakaðu alla jafna öll óþægindi sem viðskiptavinurinn hefur orðið fyrir og láttu hann vita að þú skiljir hann.
- Haltu ró þinni og ekki rökræða við viðskiptavininn.
- Reyndu að átta þig á vandamálinu frá sjónarhóli viðskiptavinarins.
Næst þarf að finna lausn á vandanum:
- Gott er að spyrja viðskiptavininn hvað hann vilji og veita honum það, ef mögulegt er.
- Ef þú getur ekki leyst úr kvörtuninni sjálf/-ur er mikilvægt að þú vitir hvenær á að vísa viðskiptavini til næsta yfirmanns. Láttu viðskiptavininn vita að þú hafir samband við næsta yfirmann og ætlir að leysa úr málinu sem fyrst.
- Ef þú þarft að koma á framfæri óvinsælum skilaboðum til viðskiptavinarins er mikilvægt að gera það á kurteisan og faglegan hátt.