Ráðstefna um menntun og færni á vinnumarkaði verður haldin á vegum Vinnumálastofnunar, SA, ASÍ og Hagstofu Íslands  fimmtudaginn 9. nóvember á Hilton Hótel Reykjavík Natura kl. 08:10-10:30.

Hvert stefnir Ísland?

Örar breytingar á tækni, efnahagslífi og samfélaginu gera það að verkum að nauðsynlegt er að vera vel undirbúin og meðvituð um ólíkar sviðsmyndir sem framtíðin kann að bera í skauti sér. Þannig má efla samspil atvinnulífs og menntunar sem leiðir til þess að verðmætari störf verða til og lífskjör landsmanna batna.

Stór hluti Evrópuríkja stundar greiningu á færni- og mannaflaþörf á vinnumarkaði. Markmiðið er að styðja við stefnumótun í mennta- atvinnu- og vinnumarkaðsmálum ásamt því að veita einstaklingum bestu upplýsingar til að efla menntun sína og færni.

Spár um færni- og mannaflaþörf á vinnumarkaði hafa hingað til ekki verið unnar markvisst á Íslandi. Við erum því eftirbátar nágrannaþjóða þegar kemur að heildarstefnumótun m.t.t. þróunar færni og menntunar á vinnumarkaði. Á ráðstefnunni kynna sérfræðingar aðferðir sem nýttar eru við gerð færnispáa í Bretalandi, Svíþjóð, Írlandi og annars staðar í Evrópu.