Ráðherra ferðamála, Þórdís Kolbrún Reykfjörð Gylfadóttir, undirritaði í dag þjónustusamning við Fræðslumiðstöð atvinnulífsins (FA) um að hýsa verkefnið Hæfnisetur ferðaþjónustunnar. Atvinnuvega- og nýsköpunarráðuneytið leggur til rúmlega 50 m.kr. á ári til verkefnisins næstu þrjú árin frá og með 2018. Markmið verkefnisins er að auka gæði og hæfni í ferðaþjónustu, einkum framlínustarfsmanna og millistjórnenda. Í því samhengi verður sérstaklega horft að fræðslu sem aðlöguð er starfsmönnum fyrirtækja í ferðaþjónustu og fer fræðslan fram inni í fyrirtækjunum eins og kostur er.
Verkefnið hófst með sérstöku framlagi atvinnuvega- og nýsköpunarráðuneytisins (ANR) í janúar sl. og hefur verið unnið ötullega að verkefninu síðan af hálfu starfsmanna Hæfnisetursins. Fundað hefur verið með fræðsluaðilum, fyrirtækjum og stofnunum og tilraunaverkefni er farið af stað með þátttöku fræðsluaðila sem sjá um framkvæmd fræðslunnar. Verkefnið er unnið á grundvelli skýrslu Stjórnstöðvar ferðamála sem stjórnvöld og Samtök ferðaþjónustunnar ýttu úr vör um hæfni í ferðaþjónustu en skýrslan kom út á síðasta ári. Markmiðið er að auka framleiðni og gæði í ferðaþjónustu sem og starfsánægju og fagmennsku starfsmanna í þessari mikilvægu atvinnugrein. Það verður gert m.a. með hæfnigreiningum starfa, þróun raunfærnimats og námskeiða, þrepaskiptu starfsnámi, rafrænni fræðslu ásamt fræðslu innan fyrirtækja. Hæfnisetrið býður þessi verkfæri til afnota fyrir fræðsluaðila og fyrirtæki og er markmiðið að ná til sem flestra starfsmanna í ferðaþjónustu. Jafnframt verður lögð áhersla á að mæla árangur fræðslu í t.d. starfsmannaveltu, framlegð o.fl. rekstrarþáttum fyrirtækja.
Aðrir aðstandendur verkefnisins voru að vonum ánægðir:
“Við hjá Fræðslumiðstöðinni erum mjög stolt yfir að okkur skuli vera falið þetta verkefni og finnum jafnframt til mikillar ábyrgðar. Við eigum fullt af verkfærum í fræðslu af þessu tagi fyrir fræðsluaðila og fyrirtæki og erum einnig að þróa ný sem nýtast í verkefnið. Okkar markmið er að þessir peningar skili sér margfalt út í greinina innan fárra ára” sagði Sveinn Aðalsteinsson, framkvæmdastjóri Fræðslumiðstöðvar atvinnulífsins.
„Ör vöxtur í ferðaþjónustu kallar á markvissar og um leið hraðar úrbætur í fræðslumálum. Það er því sérlega ánægjulegt að með samningi þessum sé starfsemi Hæfnisetursins fest í sessi til næstu þriggja ára.“ sagði María Guðmundsdóttir, fræðslustjóri SAF og formaður stýrihóps Hæfnisetursins.
Myndin hér að ofan var tekin við undirritun samnings í morgun, f.v. Sigrún Brynja Einarsdóttir, skrifstofustjóri ferðamálaskrifstofu ANR, Sveinn Aðalsteinsson, framkvæmdastjóri Fræðslumiðstöðvar atvinnulífsins, Þórdís Kolbrún Reykdal Gylfadóttir, ferðamála-, iðnaðar og nýsköpunarráðherra og María Guðmundsdóttir, fræðslustjóri Samtaka ferðaþjónustunnar.
