Ferðaþjónustan treystir eigin fagmennsku en kallar eftir auknu eftirliti
Hæfnisetur ferðaþjónustunnar, í samstarfi við Ferðamálastofu, Markaðsstofur landshlutanna og Samtök ferðaþjónustunnar, birti í dag niðurstöður könnunar á viðhorfi til öryggismála innan greinarinnar. Markmiðið var að varpa ljósi á hvernig fyrirtæki meta eigin öryggisvitund, hvernig þau upplifa stöðu greinarinnar í heild og hvar þörf sé á frekari stuðningi.
Könnunin var opin frá 11. mars til 8. apríl 2026 og bárust svör frá 181 aðilum úr öllum landshlutum. Flestir svarendur starfa innan afþreyingar- og ævintýraferða en svör bárust frá öllum sviðum ferðaþjónustunnar.
Sjálfstraust en skortur á formlegu eftirliti
Meirihluti fyrirtækja metur eigin stöðu í öryggismálum sem „frekar sterka“ eða „mjög sterka“, sem bendir til mikils trausts á innra verklagi og hæfni starfsfólks. Athygli vekur að 35% fyrirtækja byggja eftirlit með öryggisáætlunum fyrst og fremst á almennu trausti til fagmennsku starfsfólks fremur en formlegu, skráðu eftirliti á borð við gátlista eða atvikaskýrslur.
Veikleikar taldir liggja hjá „hinum“
Áhugaverð gjá myndast þegar svarendur meta greinina í heild. Mat á öryggismálum í ferðaþjónustu almennt er mun gagnrýnna en mat á eigin rekstri. Fleiri telja greinina í heild þarfnast úrbóta, sem gefur til kynna að fyrirtæki upplifi veikleika fremur hjá öðrum en sjálfum sér - hvort sem það eru aðilar sem starfa án tilskilinna leyfa eða á jaðri reglugerða.
Kallað eftir raunverulegum afleiðingum
Í opnum svörum könnunarinnar kom fram skýrt ákall eftir:
• Meira samræmi í kröfum
• Auknu og skilvirkara eftirliti
• Raunverulegum afleiðingum þegar öryggismálum er ábótavant
Ljóst er að þótt flest fyrirtæki standi sig vel, getur slakt öryggiseftirlit hluta markaðarins skaðað heildarímynd íslenskrar ferðaþjónustu og dregið úr trausti ferðamanna.
Niðurstöður könnunarinnar í heild sinni má skoða hér: Niðurstöður