Fjármögnun

Fyrirtæki geta sótt um styrki til fræðslu og þjálfunar úr starfsmenntasjóðum atvinnulífsins. Ýmis konar fræðsla og þjálfun er styrkt t.d. vegna utanaðkomandi fræðslu og námskeiða, innri fræðslu fyrirtækisins, fræðslustjóra að láni o.fl.

Starfsmenntasjóðir atvinnulífsins hafa nú sameinast um vefsíðuna Áttina þar sem fyrirtæki geta með einni umsókn sótt um styrki til fræðslu.

Í hvaða sjóði á ég að sækja?

Ef starfsmannahópurinn (þátttakendur í fræðslunni) er dreifður í mörg stéttarfélög getur verið að það þurfi að haka við fleiri en einn sjóð í umsókn. Hér er yfirlit um aðild stéttarfélaga (og þar með félagsmanna):

  • Landsmennt verkafólk á landsbyggðinni -SA, landsmennt.is
  • Starfsafl Efling, VSFK, Hlíf – SA, starfsafl.is
  • Starfsmenntasjóður verslunar-og skrifstofufólks (SVS) VR/LÍV -SA, starfsmennt.is
  • IÐAN, idan.is
  • Starfsmenntasjóður verslunar (SV) VR/LÍV -FA, starfsmennt.is
  • Starfsmenntasjóður sambands stjórnendafélaga og SA vssi.is
  • Rafiðnaðarskólinn rafiðnaðarmenn raf.is

Hvernig fæ ég aðgang að Áttinni?

Ef þú ert að sækja um í fyrsta skipti þá fyllir þú í allar nauðsynlegar upplýsingar, bæði um fyrirtækið og verkefnið. Notendanafn og lykilorð skapast síðan þegar þú sendir umsóknina. Notendanafn verður kennitala fyrirtækisins og lykilorð færðu sent í pósti.

Hvað tekur afgreiðsla umsóknar langan tíma?

Frá 2 – 30 daga. Í sumum sjóðum/setrum fara umsóknir fyrirtækja fyrir stjórnir til afgreiðslu og þar af leiðandi getur afgreiðsla tekið lengri tíma. Stjórnarfundir sjóða/setra eru iðulega haldnir einu sinni í mánuði og því er hámarksviðmið afgreiðslu 30 dagar.

Hvert skal leita til að fá nákvæmar tölur varðandi rétt á styrk hjá sjóðunum?

Sumir sjóðir/setur reikna réttindi fyrirtækja til styrkja út frá inngreiðslu iðgjalda síðustu mánuði. Best er að hafa samband við viðkomandi sjóð/setur ef óskað er nánari upplýsinga.

Þarf fyrirtæki að hafa greitt lengi í sjóðina til að geta sótt um styrk í þá?

Sumir sjóðir/setur setja kröfu um lágmarkstíma aðildar að sjóðunum (greiðslu iðgjalda). Best er að hafa samband við viðkomandi sjóð/setur ef óskað er nánari upplýsinga.

Hvenær er styrkur til fyrirtækja greiddur út?

Venjulegast er greitt út fáeinum dögum eftir að nauðsynleg fylgiskjöl hafa borist, þ.e. búið er að halda námskeiðið/þjálfunina og afrit reiknings hefur borist ásamt lista yfir þátttakendur með kennitölum og stéttarfélagsaðild.

Lækkun iðgjalda / Styrkur til eigin fræðslu

Margir sjóðir styrkja fræðslu fyrirtækja þar sem fyrirtækin nota eigin leiðbeinendur. Ýmist eru fyrirtæki styrkt með beinum hætti eða þau geta sótt um lækkað iðgjald. Fræðsluáætlun þarf að liggja fyrir og styrkur er alltaf greiddur út eftir að fræðsla hefur farið fram. Reglur sjóðanna eru nokkuð mismunandi og því er best að kynna sér málin hjá sjóðunum t.d. StarfsafliLandsmennt, Starfsmenntasjóði verslunar- og skrifstofufólks og Menntasjóði Sambands stjórnendafélaga.

Fræðslustjóri að láni

Fræðslustjóri að láni er samvinnuverkefni allra sjóðanna/setranna. Verkefnið byggist á að lána út mannauðsráðgjafa, sérhæfðum í vinnustaðafræðslu og óformlegri menntun, til fyrirtækja í tiltekinn tíma. Ráðgjafinn fer yfir fræðslu- og þjálfunarmál fyrirtækisins og gerir greiningu á þörfum þess í samvinnu við stjórnendur og starfsfólk. Út frá greiningunni er unnin fræðslu- og símenntunaráætlun sem leggur grunn að markvissri fræðslu starfsmanna. Enginn útlagður kostnaður er vegna fræðslustjórans. Sjá nánar á vefsíðum sjóðanna og á fraedslustjori.is

Hvernig sækir fyrirtæki um Fræðslustjóra að láni?

Það er gert á vefsíðunni attin.is, Sækja um – takkinn, haka við Fræðslustjóri að láni.

Niðurgreidd námskeið RSÍ og Iðunnar

Rafiðnaðarskólinn og IÐAN fræðslusetur nota starfsmenntagjald, sem þau fá greidd vegna sinna félagsmanna (iðnaðarmanna), til að niðurgreiða sérhæfða fræðslu í þágu félagsmanna sinna. Fyrirtæki eru hvött til að kynna sér úrval námskeiða á vefsíðum Rafiðnaðarskólans og IÐUNNAR.