Ferðaþjónustufyrirtæki á Ásbrú í samstarfi um fræðslu

Miðstöð símenntunar á Suðurnesjum, Hæfnisetur ferðaþjónustunnar og fjögur ferðaþjónustufyrirtæki á Ásbrú undirrituðu samning um greiningu fræðsluþarfa hjá fyrirtækjunum. Verkefnið er fyrsta klasaverkefnið sem Hæfnisetur ferðaþjónustunnar stendur að og er ætlað að auka hæfni starfsmanna í fyrirtækjunum.
Fyrirtækin sem mynda klasann eru Bed & Breakfast hótel, Base hótel, Eldey hótel og Start hostel. Öll eru þessi fyrirtæki á Ásbrú í nálægð við Keflavíkurflugvöll.
Fyrirtækin eru gæða gististaðir með afslappað andrúmsloft, mikinn metnað og stefna að því að bjóða upp á fyrsta flokks þjónustu. Þau hafa metnað til að vera í fremstu röð í þeirri stórhuga uppbyggingu sem er á svæðinu. Með því að fjárfesta í hæfni starfsfólks með fræðslu og þjálfun telja fyrirtækin að þau auki gæði, starfsánægju, framleiðni og arðsemi.
Með aukinni samvinnu sjá fyrirtækin tækifæri til að auka hæfni starfsmanna sinna á hagkvæman hátt og deila reynslu í því skyni að bæta enn frekar góða þjónustu sína við ferðamenn.
MSS sér um framkvæmd verkefnisins. Þörfin fyrir þjálfun og fræðslu í fyrirtækjum verður metin og greind og í kjölfarið útbúin fræðsluáætlun eftir þörfum og óskum hvers fyrirtækis og í samráði við stjórnendur og starfsmenn. MSS sér um að koma áætluninni í framkvæmd í nánu samstarfi við fyrirtækin og á forsendum þess.

Á myndinni eru Jónatan Ægir Guðmundsson frá Base hótel, Freyja Árnadóttir frá Bed & Breakfast hótel, Margrét Jóna Jónsdóttir frá Start hostel og Sunna Pétursdóttir frá Eldey hótel.

Norræna nemakeppnin í framreiðslu og matreiðslu í Kaupmannahöfn.

Norræna nemakeppnin í matreiðslu og framreiðslu fór fram í Hótel- og veitingaskólanum í Kaupmannahöfn föstudaginn 20. og laugardaginn 21. apríl 2018. Íslensku nemarnir í framreiðslu unnu til gullverðlauna og matreiðslunemarnir fengu silfurverðlaun.

Matreiðslu- og framreiðslunemar frá Danmörk, Finnlandi, Íslandi, Noregi og Svíþjóð keppa um titilinn matreiðslu- og framreiðslunemi Norðurlanda. Keppnin á sér langa sögu en fyrsta keppnin var skipulögð árið 1981.

Tveir matreiðslunemar og aðrir tveir framreiðslunemar, 23 ára og yngri, kepptu frá hverju landi. Íslensku keppendurnir í matreiðslu voru þeir Steinbörn Björnsson nemi í Hörpu og Hinrik Lárusson nemi á Radisson SAS Blu. Þjálfari nemanna var Georg Arnar Halldórsson. Í framreiðslu kepptu þeir Sigurður Borgar Ólafsson nemi á Radisson SAS Blu og Axel Árni Herbertsson nemi í Bláa lóninu. Þjálfari nemanna var Tinna Óðinsdóttir.

Keppnin stóð yfir í tvo daga og verkefnin voru fjölbreytt. Nemarnir þreyttu faglegt fagpróf. Matreiðslunemarnir matreiddu klassíska asparsúpu, listauka “Amuse bouches” úr nautaskanka og Jerúsalem ætiþislnum og heitan grænmetisrétt en hluti af hráefninu kom úr ræktun skólans. Á laugardaginn unnu keppendur í matreiðslu og framreiðslu saman að verkefnum dagsins. Þau fengu svokallaða leyndarkörfu og áttu að matreiða og framreiða fimm rétta máltíð. Hráefnin í leyndarkörfunni voru kjúklingur, kjúklingalifur, bleikja, humar, möndlur, hvítt súkkulaði og rabarbari. Framreiðslunemarnir kepptu í vínfræðum, fyrirskurði, uppdekkningu á borðum og borðskreytingum, pöruðu vín saman með matseðlum, blönduðu drykki (kokteila), í mismunandi framreiðsluaðferðum og faglegri framreiðslu.

Forsíðumynd: Gull- og silfurverðlaunahafarnir. Frá visntri eru Hinrik Lárusson, matreiðslunemi, Axel Árni Herbertsson framleiðslunemi, Sigurður Borgar Ólafsson matreiðslunemi og Steinbjörn Björnsson matreiðslunemi.

Leiðsögunám hjá Símenntun Háskólans á Akureyri – veturinn 2018-19

Leiðsögumenn hafa fjölbreytta starfsmöguleika enda er námið fjölbreytt. Fjallað er um jarðfræði Íslands, sögu og menningu, gróður, dýralíf, atvinnuvegi og íslenskt samfélag, bókmenntir og listir. Helstu ferðamannastaði á Íslandi, ferðamannaleiðir, náttúruvernd, umhverfismál og leiðsögutækni. Auk þess sem farið er í vettvangsferðir. Inntökuskilyrði námsins er 21 árs aldurstakmark, stúdentspróf eða sambærilegt nám og þurfa nemendur að standast munnlegt inntökupróf á því tungumáli sem þeir hyggjast leiðsegja á. Inntökupróf verða þriðjudaginn 29. maí milli 16 og 19.

Frekari upplýsingar um námið: simenntunha.is, í síma 460 8091 eða með því að senda póst á simenntunha@simenntunha.is

VILTU ÞJÁLFA STARFSFÓLK?

Þjálfun í gestrisni er efni ætlað til þjálfunar og fræðslu á vinnustað. Starfsmaður í fyrirtækinu getur haldið utan um þjálfunina í samstarfi við vinnuveitanda eða fengið utanaðkomandi fræðsluaðila í verkið. Efnið byggir á fjölbreyttum sögum, stuttum eða löngum, af atburðarás sem átt hefur sér stað við ákveðnar aðstæður. Þjálfunarefnið miðast við fjóra starfaflokka sem eru:
• Móttaka og aðbúnaður
• Veitingar
• Þrif og umgengni
• Bílaleiga
Efnið er aðgengilegt öllum á íslensku, ensku og pólsku og það má nálgast það á heimasíðu Hæfniseturs ferðaþjónustunnar www.haefni.is

Þjálfun og fræðsla fyrir starfsfólk Stracta hótels

Stracta hótel, Fræðslunet Suðurlands og Hæfnisetur ferðaþjónustunnar hafa undirritað samning um tilraunaverkefni um fræðslu og þjálfun starfsmanna. Markmið þess er að efla gæði og færni í ferðaþjónustu hér á landi.
Stracta Hótel er staðsett á Hellu og er búið fjölbreyttri og góðri aðstöðu til hvíldar og afþreyingar. Hótelið leggur áherslu á jákvæða upplifun af gistingunni, veitingunum og þjónustunni í nánum tengslum við náttúruna. Matreiðslumennirnir leggja áherslu á hráefni úr næsta nágrenni eins og kostur er. Hótelið tók til starfa í júní 2014. Á Stracta hótel starfa á milli 40 til 60 starfsmenn eftir árstíðum.
Á myndinni sem var tekin við undirritun samninga eru þau Eyjólfur Sturlaugsson framkvæmdastjóri Fræðslunetsins, Svava Sæberg veitingastjóri og Jacek Miroslaw Sosnowski matreiðslumaður frá Stracta hótel á Hellu.

Hæfnisetur ferðaþjónustunnar gerir samning við Stefnu um þróun á rafrænni fræðslu

Hæfnisetur ferðaþjónustunnar hefur samið við Stefnu um þróun á rafrænni fræðslu fyrir fyrirtæki í ferðaþjónustu. Markmið með samningnum er að nýta smáforritið Veistu til að efla þekkingu framlínustarfsmanna í ferðaþjónustu. Veistu er hugbúnaður sem gefur möguleika á að útbúa skemmtilega spurningaleiki sem styðja við fræðslu. Spurningaleikjunum er síðan deilt með starfsfólki sem getur svarað þeim í snjalltækjum. Hæfnisetrið mun þróa grunnsöfn spurninga sem fyrirtæki og samstarfsaðilar Hæfnisetursins geta fengið aðgang að.

Sveinn Aðalsteinsson, Hæfnisetrinu, og Jóhanna María Kristjánsdóttir, Stefna ehf., skrifuðu undir samstarfssamninginn í morgun.

Nánar um Veistu má finna hér

Nýtt mastersnám í ferðaþjónustu hefst í HR í haust

Þekking og hæfni í faglegri stjórnun í ferðaþjónustu er verðmæt í íslensku atvinnulífi enda starfar mikill fjöldi fólks við greinina. Í þessu 14 mánaða stjórnunarnámi njóta nemendur sérfræðiþekkingar hérlendra og erlendra sérfræðinga og öðlast þekkingu og færni í að stýra fyrirtækjum í ferðaþjónustu og nýta sóknarfæri.

Sérfræðiþekking í umfangsmikilli atvinnugrein

Eftirspurn eftir þekkingu
Meistaranám í stjórnun í ferðaþjónustu undirbýr nemendur fyrir stjórnunarstörf í fyrirtækjum og skipulagsheildum í ferðaþjónustu hér á landi og erlendis. Námið endurspeglar aukið mikilvægi greinarinnar út um allan heim og þar með eftirspurn eftir sérfræðiþekkingu á þessu sviði sem nýtist til að stýra rekstri fyrirtækja með samfélagsábyrgð og sjálfbærni að leiðarljósi.

Sívaxandi grein
Fyrirtæki í ferðaþjónustu eru mörg og starfsemi þeirra er afar fjölbreytt. Starfsemin er bæði alþjóðleg og innlend og til atvinnugreinarinnar teljast ferðaskrifstofur, gististaðir og hótel ásamt skipuleggjendum ferða og afþreyingar. Einnig eru ýmsar menningarstofnanir og stofnanir hins opinbera áberandi á þessu sviði. Atvinnugreinin er umfangsmikil og hefur undanfarin ár aflað um 40% gjaldeyristekna Íslands.

Markviss hæfniuppbygging innan ferðaþjónustufyrirtækja

Þann 3. apríl skrifuðu Mímir, Íslenskir fjallaleiðsögumenn og Hæfnisetur ferðaþjónustunnar undir þríhliða samning varðandi að koma á markvissri hæfniuppbyggingu innan ferðaþjónustufyrirtækja og meta árangur af því. Mímir vinnur nú að verkefninu Fræðslustjóri að láni hjá Íslenskum fjallaleiðsögumönnum en Starfsmenntasjóður verslunar og skrifstofufólks (SVS) og Starfsafl fjármagna verkefnið.

Bílaleigan Geysir í samstarf við Hæfnisetur ferðaþjónustunnar

Bílaleigan Geysir í Reykjanesbæ er fjölskyldufyrirtæki sem stofnað var árið 1973. Reksturinn hefur verið í núverandi mynd frá árinu 2003 og fjöldi starfsmanna er vel á fimmta tug. Fyrirtækið er með gæðavottun Vakans
Lögð er áhersla á að allir starfsmenn vinni að því markmiði að viðskiptavinirnir séu ánægðir og fái eins persónulega og góða þjónustu eins og möguleg er
Það er alþjóðlegt yfirbragð hjá Geysi þar starfar fólk frá hinum ýmsum stöðum eins og Íslandi, Hondúras, Bandaríkjunum, Bretlandi, Litháen og Póllandi. Bílaleigan Geysir er fyrsta fyrirtækið á Suðurnesjunum sem tekur þátt í tilraunaverkefni um fræðslu í samstarfi við Hæfnisetur ferðaþjónustunnar og Miðstöð símenntunar á Suðurnesjum.

Hæfnisetur ferðaþjónustunnar tók þátt í samhristingi Ferðamálasamtaka Snæfellsness

Samhristingur Ferðamálasamtaka Snæfellsness var haldinn á Arnarstapa þriðjudaginn 6. mars s.l.

Þeir sem gátu gefið sér tíma fyrir sögufylgd gengu frá bílastæðinu við höfnina, að útsýnispalli sem þar hefur verið komið fyrir, og eftir ströndinni (sem hefur verið friðland frá 1977), að styttunni af Bárði Snæfellsás eftir Ragnar Kjartansson, fram hjá Eystrigjá, Miðgjá og Músagjá, Gatkletti, Pumpu ofl. stöðum sem allir ferðaþjónustuaðilar á Snæfellsnesi verða að þekkja. Á eftir var farið að Stapagili, þar sem komið hefur verið upp aðstöðu fyrir steinhögg og útilistaverkagerð.

Kl. 17 voru yfir 30 ferðaþjónustuaðilar á Snæfellsnesi mættir í Samkomuhúsið á Arnarstapa. Fyrst var rætt um sameiginlegt kynningarefni Snæfellinga á Mannamóti, stefnumóti ferðaþjónustuaðila á landsbyggðinni og ferðaskipuleggjenda og ferðaskrifstofa, sem Markaðsstofur landshlutanna skipuleggja ár hvert. Að þessu sinni voru 18 ferðaþjónustufyrirtæki af Snæfellsnesi með og 14 nýttu sér þetta tilraunaverkefni. Hrafnhildur í Krums, sem útbjó kynningarefnið, sagði frá. Fundarmenn lýstu yfir ánægju með verkefnið og vilja til að halda áfram að þróa sameiginlegt kynningarefni. Við erum öll á Snæfellsnesi og það kom vel út að hafa sameiginlegan bakgrunn og að raða fyrirtækjunum upp landfræðilega.

Fulltrúar fyrirtækjanna kynntu sína þjónustu og dreifðu kynningarefni. Eins voru á Samhristingnum starfsfólk í upplýsingaveitu til ferðamanna á Snæfellsnesi.

Svæðisgarðurinn Snæfellsnes kynnti þau samvinnuverkefni á Snæfellsnesi sem eru í undirbúningi eða fullum gangi núna.

  • Áframhaldandi uppbygging áfangastaða
  • Gestastofa Snæfellsness/Upplýsingamiðstöð Snæfellsness
  • Barnamenningarhátíð verður haldin á Snæfellsnesi á árinu.
  • Unnið er að skiltastefnu, að öll skilti á Snæfellsnesi verði á íslensku og ensku og til séu leiðbeiningar um efnisval/liti og aðra hönnun.
  • Samstarf um matarauð Snæfellsness
  • Árlegur safna og sýningadagur verður haldinn 19. apríl n.k.
  • Árleg fjölmenningarhátíð verður haldin 20. október n.k.
  • Samstarf við þjóðgarðinn Snæfellsjökul
  • Samstarf við Umhverfisvottun Snæfellsness
    • Jarðarstund 24. mars þar sem Snæfellingar eru hvattir til að slökkva ljós í klukkustund og hugsa um umhverfismál
  • Shape er þriggja ára verkefni um sjálfbæra ferðaþjónustu með styrk frá Norðurslóðaáætluninni. Það gengur út á að virkja tengslanet hagsmunaaðila í hverjum svæðisgarði, skilgreina verkefni og vandamál og vinna saman að sjálfbærni og ábyrgri ferðaþjónustu. Kortleggja náttúru og menningararf og deila góðum dæmum.
  • Sagnaseiður og atvinnumannadeildin Sögufylgjur.

Símenntun Vesturlands og Hæfnissetur ferðaþjónustunnar kynntu hvaða þjónustu þau gætu boðið fyrirtækjum.  Símenntun Vesturlands hefur tekið þátt í mörgum samvinnuverkefnum á Snæfellsnesi síðustu misseri og Brynja Mjöll er sérstakur starfsmaður Símenntunar á Snæfellsnesi.

Hæfnisetur ferðaþjónustunnar er verkefni til næstu þriggja ára og er markmiðið að auka gæði í ferðaþjónustu á Íslandi. Hæfnisetrið og Símenntun Vesturlands telja að það geti þau gert með því að bjóða fyrirtækjum sérsniðna fræðslu og þjálfun fyrir starfsfólkið sem hentar hverju fyrirtæki fyrir sig.

Fyrirtækjum á Snæfellsnesi stendur nú til boða að fá aðstoð þeim að kostnaðarlausu við að greina þarfir og koma á markvissri þjálfun starfsmanna.

Góðar umræður urðu um öll þessi mál. Að lokum var unnið að uppfærslu á félagatali Ferðamálasamtaka Snæfellsness og ferðaþjónustuaðilar voru hvattir til að nota #visit Snæfellsnes til að merkja myndir á Instagram.

Næsti Samhristingur verður í rútu frá Snæfellsnes Excursions um Snæfellsnes í apríl eða byrjun maí. Svæðisgarðurinn Snæfellsnes hjálpar til við skipulagningu og leiðsögn um áfanga og þjónustustaði. Allir sem vilja bjóða heim eru hvattir til að hafa samband (ragnhildur@snaefellsnes.is)