Menntamorgnar ferðaþjónustunnar – Okkar bestu hliðar

Fyrsti fundurinn verður fimmtudaginn 31. janúar kl. 8.30 – 10.00 í Húsi atvinnulífsins, Borgartúni 35

Dagskrá:

Verkfærakista Hæfniseturs ferðaþjónustunnar  – Hildur Hrönn Oddsdóttir, sérfræðingur hjá Fræðslumiðstöð atvinnulífsins

Kynning á fagorðasafni ferðaþjónustunnar – María Guðmundsdóttir, fræðslustjóri SAF

Hvernig gengur með íslenskuna? – Stefán Karl Snorrason, starfsþróunar- og gæðastjóri hjá Íslandshótelum og Marina Isabel Pimenta de Quintanilha e Mendonça leiðsögumaður

Nokkur orð um smámálið – Andri Snær Magnason rithöfundur

Spjöllum saman – umræður – Sveinn Aðalsteinsson, framkvæmdastjóri hjá Fræðslumiðstöð atvinnulífsins stjórnar umræðum

Fundarstjóri er Jóhannes Þór Skúlason, framkvæmdastjóri SAF

Kaffi og morgunhressing – allir velkomnir!

Vinsamlegast skráið þátttöku hér

 

Höldur semur við Hæfnisetrið um notkun á Veistu hugbúnaðinum

Höldur hefur samið við Hæfnisetrið um að taka til notkunar Veistu smáforritið. Veistu smáforritið gefur möguleika á að útbúa skemtilega spurningaleiki sem styðja við fræðslu. Spurningaleikjunum er deilt með starfsfólki sem getur svarað þeim í snjalltækjum. Hæfnisetrið hefur þróað grunnsöfn spurninga sem fyrirtæki geta fengið aðgang að.

Nánar um Veistu má finna hér

Mannamót 2019 í Kórnum í Kópavogi

Markaðsstofur landshlutanna, í samvinnu við flugfélagið Erni og Isavia, setja upp vinnufundinn Mannamót fyrir samstarfsfyrirtæki sín fimmtudaginn 17. janúar 2019 kl. 12:00 – 17:00 í Kórnum í Kópavogi.

Mannamót markaðsstofanna er kynningarvettvangur ferðaþjónustunnar á landsbyggðinni og tækifæri til að koma á fundum fagaðila í greininni. Tilgangurinn er að kynna landsbyggðarfyrirtæki fyrir ferðaþjónustuaðilum sem staðsettir eru á höfuðborgarsvæðinu.

Ísland hefur mikið upp á að bjóða og Mannamót hjálpar til við að mynda tengsl innan ferðaþjónustunnar. Gestum á Mannamóti gefst kostur á kynna sér það sem mismunandi landshlutar eru að bjóða upp á, með áherslu á vetrarferðamennsku.

Athugið að aðeins samstarfsfyrirtækjum Markaðsstofa landshlutanna gefst kostur á að skrá sig á Mannamót til þess að sýna og kynna sitt fyrirtæki. Öllum er frjálst að mæta á viðburðinn og enginn aðgangseyrir er fyrir gesti. Við biðjum þó þá sem ætla að koma sem gestir að skrá sig svo hægt sé að áætla fjöldann.

Skráningu lýkur þann 10. janúar 2019.

Skráning: http://www.markadsstofur.is/is/frettir/skraning-hafin-a-mannamot-2019

 

Jólakveðja

Aukin hæfni í ferðaþjónustu – betri upplifun gesta

Adventure Hótel Geirland, Hæfnisetur ferðaþjónustunnar og Fræðslunet Suðurlands hafa gert með sér samning um fræðslu og þjálfun fyrir starfsfólk hótelsins. Verkefnið fer af stað í janúar 2019.

Adventure Hótel Geirland er 40 herbergja sveitahótel, með veitingahúsi, um 2 km frá Kirkjubæjarklaustri.  Hótelið er vel staðsett á suðurlandi nálægt mörgum af helstu perlum suðurlands t.d.  Mýrdalsjökli, Fjaðrárgljúfur, Skaftafelli, Vatnajökli, Jökulsárlóni. Um 15-17 starfsmenn eru á hótelinu

Hótel Geirland er hluti af Adventure Hotels ehf og er í eigu Arctic Adventures (Straumhvarfs ehf) sem er ferðaþjónustu fyrirtæki.

Arctic Adventures  adventures.is selur og framkvæmir fjöldann allan af ferðum fyrir ferðamenn sem vilja upplifa ævintýri og njóta náttúru Íslands.  Meðal ferða sem boðið er upp á með leiðsögn eru jöklagöngur, köfun, yfirborðsköfun, snjósleðaferðir, íshellaferðir, hvalaskoðun, flúðasiglingar, gönguferðir um hálendið, dagsferðir, 2-6 daga ferðir um landið osfrv.

 

 

Menntaverðlaun atvinnulífsins 2019 – óskað eftir tilnefningum

Menntaverðlaun atvinnulífsins verða afhent í Hörpu fimmtudaginn 14. febrúar 2019. Óskað er eftir tilnefningum um fyrirtæki sem hafa staðið sig vel á sviði fræðslu- og menntamála fyrir 18. desember nk.

 

Það má alltaf gera gott betra og því er mikilvægt að þjálfa og fræða starfsfólk

Hótel Hvolsvöllur býður upp á vinalega gistingu í fallegu umhverfi. Hótelið er búið 64 herbergjum. Starfsmenn leggja sig fram við að veita frábæra þjónustu og vilja að gestirnir eigi góðar minningar eftir dvölina hjá þeim. Þess vegna er mikill vilji að fara í markvissa þjálfun og fræðslu í samstarfi við Hæfnisetur ferðaþjónustunnar og Fræðslunet Suðurlands sem sjá mun um þarfagreiningu og utan um hald á allri þeirri fræðslu sem boðið verður upp á fyrir starfsfólk hótelsins.  Byrjað verður að þarfagreina í byrjun janúar 2019 og markmiðið er að vera komin með fræðsludagskrá í mars sem hægt verður að keyra fram á vorið og síðan að taka aftur upp þráðinn í september og ljúka henni fyrir áramótin 2019/2020.

Bjórböðin hljóta nýsköpunarverðlaun SAF 2018

Bjórböðin á Árskógssandi hljóta nýsköpunarverðlauna Samtaka ferðaþjónustunnar árið 2018. Eliza Reid, forsetafrú, afhenti Bjórböðunum verðlaunin á 20 ára afmæli Samtaka ferðaþjónustunnar sem fram fór á Hilton Reykjavík Nordica laugardagskvöldið 10. nóvember.

Samtök ferðaþjónustunnar afhenda árlega nýsköpunarverðlaun fyrir athyglisverðar nýjungar og er markmiðið að hvetja fyrirtæki innan SAF til nýsköpunar og vöruþróunar. Verðlaununum er ætlað að hvetja frumkvöðla landsins til dáða í ferðaþjónustu. Þetta er í fimmtánda sinn sem SAF veita nýsköpunarverðlaun samtakanna en þetta árið bárust 33 tilnefningar í samkeppninni um verðlaunin.

Bjarnheiður Hallsdóttir, formaður Samtaka ferðaþjónustunnar og formaður dómnefndar nýsköpunarverðlaunanna, gerði grein fyrir niðurstöðu dómnefndar. Dómnefndina skipuðu auk Bjarnheiðar þau Andri Kristinsson, forstjóri og stofnandi Travelade og fulltrúi fyrirtækja innan SAF og Guðrún Þóra Gunnarsdóttir, forstöðumaður Rannsóknamiðstöðvar ferðamála.

Nýsköpun í formi upplifunar

Sem fyrr endurspegla tilnefningarnar til nýsköpunarverðlauna SAF mikla grósku og nýsköpun í ferðaþjónustu um allt land. Hugmyndaauðgi, stórhugur og fagmennska einkennir mörg þau fyrirtæki sem tilnefnd voru og dómnefnd því ákveðinn vandi á höndum. Nefndarmenn voru þó einróma samþykkir því að handhafi verðlaunanna í ár séu Bjórböðin ehf.

Bjórböðin voru opnuð í júní 2017 og vöktu þegar mikla athygli bæði hérlendis sem erlendis enda eru slík böð ekki að finna hvar sem er í heiminum. Fyrirtækið kom því ekki aðeins nýtt inn á markaðinn, heldur kom það inn með glænýja upplifun þar sem vellíðan og slökun gegnir lykilhlutverki á nýstárlegan hátt.

Bjórböðin hafa skapað sér ákveðna sérstöðu í ferðaþjónustu og ferðaskrifstofur verið fljótar að taka við sér með því að bjóða upp á ferðir þar sem viðkoma í böðunum er innifalin. Bjórböðin eru því þegar orðin mikilvægur segull fyrir ferðaþjónustu á Norðurlandi og styrkja markaðssetningu áfangastaðarins allt árið um kring.

Bjórböðin voru útnefnd Sproti ársins á Uppskeruhátíð ferðaþjónustunnar á Norðurlandi haustið 2017.

Agnes Sigurðardóttir og Ólafur Þröstur Ólafsson, eigendur bruggverksmiðjunnar Kalda á Árskógssandi í Eyjafirði, stofnuðu fyrirtækið Bjórböðin ehf. árið 2015 ásamt syni þeirra og tengdadóttur. Í bjórböðunum er ger úr bjórbrugginu nýtt sem annars hefði verið hent. Bjórböðin eru lýsandi dæmi um frjóan frumkvöðla anda sem skilar sér í áhugaverðri ferðavöru og atvinnuskapandi starfsemi allt árið um kring.

Bjórböðin ehf. eru því verðskuldaðir handhafar nýsköpunarverðlauna SAF árið 2018.

Verðlaunin mikil viðurkenning

„Við hjá Bjórböðunum erum ótrúlega þakklát og stolt að hafa verið veitt þessa flotta viðurkenning. Þegar við fórum af stað í þetta verkefni höfðum við mikla trú á því að við gætum skapað nýja og ógleymanlega upplifun í ferðaþjónustu. Viðbrögðin frá gestum hafa verið gríðarlega góð og eru því þessi verðlaun mikil viðurkenning af okkar starfi og þökkum við kærlega fyrir okkur,“ segja þau Agnes Sigurðardóttir og Ólafur Þröstur Ólafsson, eigendur Bjórbaðanna.

Vilja gera góðan vinnustað betri með markvissri þjálfun og fræðslu til starfsfólks

Hótel Víking og Fjörukráin eru staðsett í miðbæ Hafnarfjaðar og er lítið persónulegt fyrirtæki í hótel – og veitingarekstri. Fyrirtækið hefur verið rekið af Jóhannesi Viðari Bjarnasyni í 28. ár eða síðan 10.  maí 1990.  Á hótelinu eru 55 herbergi.

Fjörukráin er landsþekkt fyrir sínar Víkingaveislur og þykir skara fram úr.  Fjaran/Valhöll er opið fyrir matargesti alla daga. Húsið sem hýsir veitingarstaðinn var byggt 1841 og er næstelsta hús Hafnarfjarðar. Eigendur og starfsfólk eru stolt af því að þjóna gestum á þeirra víkinga hátt og vilja gera enn betur og hafa því hafið samstarf um fræðslu og þjálfun fyrir starfsfólk sitt í samstarfi við Hæfnisetur ferðaþjónustunnar og Gerum betur ehf.

Lagt af stað í metnaðarfullt fræðslustarf þar sem áherslan verður á sérsniðna þjálfun og fræðslu

Hótel Selfoss hefur undirritað samstarfssamning um þjálfun og fræðslu við Hæfnisetur ferðaþjónustunnar og Fræðslunet Suðurlands. Verkefnastjóri í verkefninu verður Dýrfinna Sigurjónsdóttir og mun hún aðstoða stjórnendur við að koma á markvissri þjálfun og fræðslu fyrir starfsmenn.

Hótel Selfoss er glæsilegt fjögurra stjörnu hótel staðsett miðsvæðis á Selfossi. Hótelið býður upp á 139 glæsileg herbergi en árið 2016 voru fjörutíu ný herbergi tekin í notkun. Á hótelinu starfa um 100 manns.

Á Hótelinu er Riverside restaurant þar er borið fram morgunverðarhlaðborð fyrir gestina. Á veitingastaðnum er lögð rík áhersla á að bjóða uppá ferskan og bragðgóðan mat, unninn úr hráefnum úr héraðinu. Á veitingastaðnum er bar með setustofu þar sem notalegt er að sitja og njóta meðan eldurinn snarkar í arninum.

Riverside Spa á Hótel Selfossi er einstök heilsulind að evrópskri fyrirmynd þar sem ljúft er að slaka á, og endurnærast á líkama og sál. Riverside Spa er í hlýlegu og notalegu umhverfi þar sem vísað er til íslenskrar náttúru í allri hönnun. Eldur, Ís, vatn, gufa og norðurljós er fléttað inn í hönnun baðstofunnar.